病癒小補湯

23 JANUARY 2015(FRI)

上兩星期都可以話未停過病，醫生都睇左三次，真係從未試過咁病。正當我病叫好少少時，姨媽就教我用准山、茨實、蓮子、生薏米、茯苓煲肉眼瘦肉湯。簡單嘅材料就可以煲出調整身體好湯，我當然即刻去煲啦！

其實唔止我，依排好多人都唔舒服，就係咁今日我就買齊材料，返小豬爸屋企煲俾大家飲啦~

主要嘅藥材(准山、茨實、蓮子、生薏米、茯苓 )我係藥材店買，分量就可以因應煲用人數請店員同我執。由於我預六人飲用，所以就買左$25~

由於大家都係病癒，唔好用太肥嘅肉，所以就用肉眼瘦肉嚟煲依個湯，我今次就買左$50啦~

雖然依個步位嘅肉都唔太肥，不過我都會先汆一汆水，咁可以去啲肥之餘，又可以去一去啲肉血味~

煲內放約3L水，然後將所有材料放入煲內~

先用猛火煲半小時~

之後轉用慢，再煲一小時~

最後下鹽調味，可以飲得啦~

由於唔洗落蜜棗，加上我又好少煲啲藥材湯，所以開頭都有少少擔心會係啲苦苦味。不過原來一啲都唔似係飲緊藥材湯，飲落又幾清甜，就連小小豬都飲左兩大碗呀！

雖然依個湯話係病癒小補湯，不過啲藥材都係一啲潤而不燥，比較正氣嘅，所以唔單止病癒後可以飲，平日都可以煲嚟飲呀！