開心SHOPPING日

今日約左糖糖同小肥肥出去旺角行街街食飯，順便送份小小生日禮物俾快做壽星女嘅小肥肥。

開頭都只係打算買條靚裙仔俾DOLLCENA，不過行行吓，原來我都買左好幾樣野，仲樣樣都好抵，真係一個開心SHOPPING DAY呀！

哈哈~~等我介紹吓我嘅戰利品先。

第一樣當然係我一早想買嘅靚靚DOLLCENA裙仔，今次就唔係$5嘅平衫，依條裙仔都貴貴地，不過依條就係我好鐘意嘅LADY款裙仔，所以貴少少都買左.....一條咁多啦，等我聽日幫D女換左佢影番輯靚相先~~

係我地行吉之島十蚊店時，見到有買糖糖之前用過話勁好用嘅面膜。一直都好想買嚟試，不過就成日都冇返貨都買唔到。頭先見到番左貨，所以就即刻買番支先~

之後我地就四周圍行，當我地行一間鋪頭見到依個龍貓襟針時，都覺得好得意，同埋係市面都已經好少見到依個款。見佢又做緊半價，拆左都係$15，所以唔考慮咁多，買左一隻先~

同兩個妹妹仔行街街，其實都主要行兆萬睇公仔。當我地行到一間鋪頭時，見到依個DORORO公仔做緊特價。一睇到.....我地完全唔考慮每人買左一盒番屋企玩。

大家估依盒依幾多錢？(等我遲啲開估俾大家知啦)

今日真係既開心又收獲豐富。哈哈~~

不過因為都行到攰攰地，所以都要等聽日先拆玩具玩啦！