換物網

今日經糖糖介紹，知道有一個換物網，見有新野就當然八八卦卦咁CLICK上去睇吓啦！

睇見真係有好多種類，玩具、日用品、化妝品....連PET SOCIETY嘅野都有，真係勁呀！

有新野玩我當然都試下，我仲已經放左少少野上去，睇下有冇機會換到啲好嘢返嚟。

我都覺得依個換物網都幾好，可以將自己冇乜用既野換啲有用既野，一來又可環保，二來可以慳啲錢。

大家有興趣都去睇吓有冇啱心水野交換啦！

http://www.tradeduck.com/

 

勁有滿足感

今日大肥豬要開OT，所以就自己留左係屋企。不過，我冇偷懶呀，仲好乖咁嚟個家務大行動啦！

其實都唔係做左好多家務，抺左神枱，洗衫咁。不過講起洗衫，都真係勁有滿足感呀！

事緣之前大肥豬有幾件恤衫都有啲污漬，洗左幾次都唔得，總係覺得好唔夠白雪雪咁。係依個時候，醒起小豬爸之前講過有隻去污漬好勁洗衣劑，所以就買左一支嚟試吓可唔可以洗得乾淨啦！

見今日得我一個人，所以就拎左幾件衫仔去試下，諗住趁大肥豬唔係度，就算真係失敗都可以即刻毀滅佢，唔好俾佢發現嘛！

經過一輪閉關，洗洗...卒卒...擦擦...之後再放入洗衣機洗之後。終於......嘩....啲污漬真係冇得七七八八，仲有有番七八成新添。

大肥豬放工返嚟見到仲不停讚我叻，可以洗到咁乾淨添。攪到我都好開心得嚟又勁有滿足感呀！哈哈~~

金利來之夜

尋日我地四個人離開左鯉魚門之後，就去食晚餐。不過我地唔係留係鯉魚門食，而係去就嚟拆既牛頭角下村。

之前都冇乜心水諗食乜，不過有一次我睇開OPEN RICE，見佢有個牛頭角下村專輯，於是就CLICK入去八卦吓，見有一間有好多人都讚好，所以我地個晚餐就係去左..............九座嘅金利來食坊啦~

唔知係唔係就拆嘅威力，我地去到都係六點十左右，不過都已經要排隊啦！

等左一陣就有位，可能我地幾個都影到餓餓地，所以一埋枱就即刻點餸。

第一樣嚟嘅就當然係凍飲啦，唔知係唔係大肥豬成日都影得勁攰，所以今次佢竟然主動叫左支啤酒，真係....好少見佢飲啤酒，好在有大M幫手飲啲~

起菜啦......

椒鹽鮮魷拼九肚魚

蒜蓉炒豆苗

蠔餅

鹵味拼盆

芝士焗扇貝

整體上啲野食都真係唔錯，碟碟好好大碟，個味道仲唔差添。尤其係個蠔餅，真係成塊面咁大呀！哈哈~~~

個服務就真係差左少少，尤其係有位樓面姐姐，都真係惡惡地呀！不過...依啲大排檔服務都係咁啦...算啦，最緊要食得開心嘛！

四個人都只係食左二百幾，都真係幾抵食呀！今餐我地都唔好意思，因為要M&M破費添.......多謝晒！

我地一齊出去影相.....一齊食飯都真係玩得好開心，希望佢地都一樣玩得開心啦！

哈哈~~下次再繼續一齊去玩...玩....玩....影...影....影呀！

鯉魚門之旅

今日我約左M&M攝影團一齊入鯉魚門影相啦！事緣前幾日小M係論壇見到有人去左三家村影相，於是就約埋我地一齊去影。

我都N..N..N年冇去過鯉魚門，一直都以為只係食海鮮。如果唔係小M介紹，我都唔知有個靚景影相添。

原本都擔心我地個行程去唔成，因為個天氣都係麻麻地，不過我地都係鐘意影相，所以當然照去啦！好在都只係天陰陰咁，冇落雨已經好好啦！

我地邊行邊影，我地就影吓海景...石景...總之見到靚地方就影...影....影啦~

 

之後繼續向前行，去我地主要影嘅大草地進發。不過唔知點解同論壇睇到嘅有啲出入，啲草短得嚟仲有啲黑黑地添。

雖然係咁，不過嗰度又真係一個影相好地方呀~

今日影左好多相，不過我自己就覺得麻麻地，唔知係唔係件衫問題，有好多都影都我好肥呀....真激氣，唔通真係係時候要減吓肥？

我又嚟四葉妹妹

大肥豬成日都話我係個BLOG度放DOLLCENA 毒，攪到好多朋友仔都加入左DOLLCENA行列。其實係因為我好想同大家分享我鐘意嘅D女。

不過毒人毒得多，終於俾人毒番轉頭。哈哈~~

之前係FACEBOOK成日見到可樂同糖糖放左好多佢地影嘅四葉妹妹靚相，睇睇吓真係越睇越得意，所以終於都忍唔住買左一隻，加入左四葉妹妹行列。

返到屋企當然即刻拎四葉妹妹影吓相先啦~

哈哈......我又用左WALLPAPER方法影左幾張，都影得唔差，有幾張個FEEL又好似好夾咁。(又有人自己讚自己啦！)

甜蜜情人節@左麟右李

我地係西九影完相之後，就去尖沙咀行街街，食個簡簡單單嘅晚飯，之後就去向剛剛維修好嘅紅館出發。因為我地要睇左麟右李演唱會呀！

其實本身我地都冇特別想去睇依個SHOW，不過當大肥豬知道佢地加場時，個尾場就係情人節，所以就買飛帶我入去睇啦！

因為我地下午影相都影都攰攰地，所以我地就早少少入場坐吓休息吓。當然有咁多時間，我地又拎起相機周圍影啦！

邊玩邊等，終於都等到開SHOW啦！

雖然我地係坐啲山腰位，不過可以睇晒成個台，都真係唔錯。知道我地個位唔會近，所以一早冇打算影相，所以就冇拎支長鏡去。不過既然有相機係手，就試吓啦...哈哈...又幾好哦~

成晚個氣氛真係好正，完全冇悶場，首首歌都好好聽，尤其係唱快歌時，真係勁好FEEL，我拍手都拍到手紅晒呀！

因為係最後一場，所以嘉賓都多啲，有錢嘉樂、亞叻、曾志偉同埋陳友.....仲有剛有左BB嘅KELLY，真係正呀！哈哈~~

最後個SHOW係差唔多十二點先完，就係咁過左一個好開心嘅情人節啦！

甜蜜情人節@西九長廊

尋日係情人節，我當然同大肥豬出去拍拖拖慶祝一番。剛好又係唔洗返工，所以我地下午就開始出發，去玩啦！

第一站，當然去做我最鐘意嘅嘢，就係去影靚相。

之前睇到好多朋友仔去左西九長廊影嘅相都好靚，所以開頭我都有少少期望可以影好多靚相。

點知....都有啲失望，佢地好多地方都封左嚟做工程，就連近海條走廊都封左成大截(仲要係望對面海最靚嗰個位)，所以可以影嘅靚位又少左。

雖然係咁，不過我地都唔放過機會，影左好多相~

我地影影下仲落毛毛雨添，不過都冇影響我地個心情，留係唯一有蓋嘅地方，繼續影過。

話晒都係情人節，又點可以唔影番張合照呢？不過因為當日冇遊人可以幫到手，所以唯有整番張自拍照啦~

今次影依輯相，真係不得不讚下大肥豬依個攝影師。以一個初可哥嚟講，都真係唔差，影出嚟個角度都幾好哦，仲影得幾靚添。有幾張相仲係佢教我擺POSE......哈哈！

原來由買左部單反之後，大肥豬就成日去啲攝影討論區睇吓其他朋友仔嘅作品，同埋佢地嘅影相心得，話希望可以影我影得好啲。

因為本身大肥豬都唔算鐘意影相，所以我聽到又真係好開心呀！為左影我靚啲花下功夫~~

我知道大肥豬依家都已經開始鐘意影相，不過只限影我....哈哈哈！