【阿豬學整飽】迷你臘味卷&壽桃包工作坊@奇華工作坊

27 OCTOBER 2019 (SUN)

唔知幾時開始小小豬就愛上食臘腸，有一次無意間俾佢知道有得去學整臘腸卷之後，依隻臘腸控就成日都想去整(佢話自己整會更加好味哦)。

其實上年都已經想帶佢嚟整，不過因為太遲知道所以啲班都滿晒冇得去，等左一年終於再次開班，今次就快快手上網BOOK位，所以終於可以嚟「阿豬整飽」啦~

其實奇華工作坊我地都嚟過幾次，朋友都有問我仲乜要自費嚟學整，其實我就係鐘意依度環境好乾淨，同埋最重要一點....小小豬真係好想學整臘腸卷，咁就當然順下佢意滿足下佢啦！

一嚟到小小豬都已經好熟路咁搵自己嘅工作枱，仲好細心睇定個食譜添~

睇完老師示範之後，小小豬就好似大廚上身咁，好認真地加麵粉...牛奶...糖入攪拌機~

之後就串步不離咁望住個攪拌機，期待粉糰嘅誕生~

之後就要將粉糰搓一陣，就可以拎去等待發酵啦~

係等待發酵嘅時候，我地就開始整壽桃包嘅蛋黃蓮蓉餡~

雖然依隻小小豬係"論盡"左啲啲，不過佢全程都唔俾我幫手，所以個蛋黃蓮蓉餡係醜樣左少少，不過佢嘅誠意搭夠(最重要係個餡有麵糰包住，睇唔到嘅..哈哈)~

粉糰發酵好就可以開始分批慢慢整包包啦~

先嚟就整個壽桃包~

都係嗰句.....啲壽桃包係醜樣左啲(其實都唔係啲啲)，不過小小豬嘅幼力蓋過一切，同埋...都算係似個桃形呀~

終於嚟到小小豬最期待嘅臘味卷，我地有得整兩條臘腸同埋一條潤腸。依隻豬對住啲臘腸真係份外細心溫柔又專心，又整得有板有眼呀~

估唔到又卷得幾好哦~

見仲有啲粉糰，就當然唔好浪費，搓多一粒豬仔包包呀~

最後交俾負責姐姐幫手拎去焗，等一陣就食得啦~

焗好左之後將壽桃包上少少色，咁就大功告成啦~

小小豬嘅成品大功告成啦~

有個小朋友好心急咁將佢嘅包包放入盒內，仲要我快快手返屋企，因為佢要同DADDY分享呀~

基本上今次嚟整包包絕大部分都係小小豬自己整，有時我話要幫手佢都話唔洗，雖然過程都真係有點亂，不過都總叫做係由佢一手一腳咁去做，佢仲話自己整真係好味好多哦.......緊係....加埋佢啲手汗水味嘛.....哈哈哈！