三個月快樂

10 NOVEMBER 2010 (WED)

小小豬終於都踏入三個月，好似轉眼間就由一個細細粒軟綿綿，變到依家都叫做幾抵打(只係條頸仔仲係好似冇乜力咁)，時間好似過得好快，有時睇返小小豬剛剛出世嘅相，真係覺得有好大變化，好似成個樣唔同晒咁，所以話真係要無時無刻要留意，睇住佢嘅生長先得呀！

依家小小豬每朝早起身一見到有人，就會笑咪咪咁大笑。次次見到小小豬笑到咁，我都會好開心，仲唔捨得返工添~

今日係小小豬三個月，小豬媽話係一個重要日子，所以就帶左小小豬去拜神，仲點左盞聖燈，保佑小小豬平安健康，快高長大。雖然鄉下冇習例，不過小豬媽話男仔點都要點返盞燈，咁先好呀~

除左去拜神之外，小小豬都收左封利是，估唔到封利是係小豬媽帶小小豬去拜神時嗰位管理員叔叔俾呀~

 三個月哦...當然又係時間要影吓相啦~