長洲之旅

07 NOVEMBER 2009 (SAT)

計番起都有N年冇入過長洲，係上星期睇左個節目介紹長洲，所以就心思思想入去行吓，就係咁....今日我地嚟左個長洲之旅啦！

上船啦~

經過四十五分鐘車程，終於到目的地，一落船就同個平安包包公仔影相先~

其實都冇乜諗入長洲做乜，都係打算周圍行...周圍影咁~

行行吓...見到有間鋪面裝飾得好靚，見有靚景又冇乜人，當然唔好浪費影番幾張相啦~

影完相，就俾見到第一個食點...日本伯伯紅豆餅，真係冇介紹錯，啲紅豆餅唔甜得嚟又多豆，好味呀~

件紅豆餅都未消化，就搵到另一好食推介...冰糖鮮果，都唔錯，不過啲生果就雪到硬左少少，要用少少牙力先食到呀~

沿路直行，就係東堤沙灘，我想去沙灘影相好耐，最衰就係冇帶大毛巾，唔可以落水玩，只可以所以係沙灘玩陣~

見沙灘旁的士多有吹泡泡買，所以就扮吓小朋友玩吹泡泡~

玩左一陣，真係又攰又肚餓，所以就去搵嘢食醫肚。原本想去試正生餐廳試吓，不過行左個圈都搵唔到，都係怪自己之前冇抄好地址，最後我地就去左大排擋食左個普通公仔麵餐。

休息過後又食飽飽，所以又再四周圍行，就係依個時候，大肥豬就有收獲。我地行過一間買魚竿鋪頭見做緊大特價就去八卦，見啲魚竿又真係幾抵，所以我就買左支送俾大肥豬啦~

其實大肥豬想買魚竿去釣魚好耐，不過睇左好耐都未買，唔係太貴就唔合心水，估唔到入長洲會買到。哈哈...嚟緊我地又有新活動啦！

買完心頭好嘅大肥豬見個太陽開始落山，就提意返沙灘影多陣相，所以就去左沙灘石灘影型格相啦~

悠悠閒咁就過左一天，間唔中去離島行吓都係一個唔錯選擇呀！