24 JANUARY 2021(SUN)
今晚奶奶嚟食飯,咁就緊係要做好準備煲個靚湯俾佢飲,最好就係問佢想飲乜,等我唔洗頸痕之餘又可以啱佢口味。
奶奶話想飲木瓜湯,咁就當然即刻去搵啲啱嘅食譜,就係咁....今次就嚟一個簡單得嚟又有助滋陰健脾嘅青木瓜雪耳瘦肉湯~
木瓜湯我之前都有煲過,不過就係用紅肉熟木瓜嚟煲,鐘意佢夠潤之餘又夠甜。不過今次就經店主姨姨教路用左青木瓜,佢話煲俾老人家飲青木瓜係比較適合,咁我都即刻上網睇青木瓜嘅功效又幾好,所以就買粒大嘅嚟煲湯啦!
青木瓜一個、漳州雪耳一両、百合一両、南北杏約半湯匙、蜜棗三粒及瘦肉約$40~
漳州雪耳浸洗後去蒂切細件~
其他藥材浸洗一陣~
青木瓜去皮去核之後切塊,切嘅時候最好切大件少少,咁煲起之後都可以有得食木瓜呀~
瘦肉洗淨汆水備用~
煲內放約3L水,待水滾後加入所有材料~
待滾起後,繼續用大火加蓋煲約15分鐘~
之後轉慢火加蓋煲多1.5小時~
最後加鹽調味,就可以飲得啦~
估唔到青木瓜煲湯清清地又幾好飲,最重要係小小豬同奶奶都話好飲,咁就即刻安心又放心晒,小小豬仲話可以煲多幾次添!
以下係各食材嘅功效,可以參考一下呀(網上資料):
青木瓜 - 健脾和胃及增強抵抗力,能保護胃腸黏膜及預防消化道潰瘍。對胃炎、便秘及肺燥咳嗽人士均有益。
漳州雪耳 - 有助潤肺、潤膚同養顏嘅功效。
百合 - 具理脾健胃、利濕消積等功效
南北杏 - 潤肺、止咳及平喘,亦可生津開胃。
蜜棗- 止咳潤肺、化痰平喘功效。
溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!
- 雖然雪耳係好味又有益,不過都要再提多大家煲過嘅雪耳一定要即日食/飲晒,如果隔夜,經過一夜嘅浸透,佢就會放出一啲有害物,到時就有益變有害啦!
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!
- 雖然雪耳係好味又有益,不過都要再提多大家煲過嘅雪耳一定要即日食/飲晒,如果隔夜,經過一夜嘅浸透,佢就會放出一啲有害物,到時就有益變有害啦!
沒有留言:
發佈留言