再嚟雜誌袋

13 JANUARY 2010 (WED)

自從係十月買左CanCam雜誌送一個大SIZE嘅HOUSE of JILL STUART袋之後，我都好留意新出嘅日本雜誌，睇吓仲有冇靚袋送。

開頭仲估聖誕期間會有好嘢送，但原來聖誕仲比平日靜，好多雜誌都冇嘢送呀！

等左一段時間，終於都俾我等到又有好嘢送。今日同糖糖食LUNCH時見到報紙檔有新一期non-no出版，見附送左一個大袋袋又幾靚哦，加上報紙檔又有優惠，平左六蚊，就係咁....我地就每人買一本啦~

non-no都算係一本唔錯嘅日本雜誌，還記得當年年紀細嘅時候，我期期都有買，參考吓日本妹嘅衣著。不過隨住年紀開始大，唔可以再扮後生，所以就冇再買嚟睇啦！

今次再買當然主要都唔係為睇雜誌，都係為左依個袋袋啦~

返到屋企即刻開個袋袋嚟睇，又真係幾靚同大個，都幾實用~