25 SEPTEMBER 2019(WED)
前幾日奶奶嚟食飯買左好多生果嚟俾小小豬,見有兩個蛇果就當然又戚起條根想用嚟煲湯。
就係咁我就買多粒印度椰子,再加埋雪耳同紅蘿蔔,就嚟一個清熱得嚟又可以補脾,仲要加埋雪耳嘅潤,真係好啱依家天氣飲呢~
13 SEPTEMBER 2019(FRI)
小小豬最鍚嘅表姨嚟同我地一齊過中秋節,咁就當然要煲返個靚湯俾佢飲,慰勞下佢成日嚟陪依隻百厭豬玩啦!
上幾次都係煲素湯,話晒都係做節就當然要有返少少肉湯嘅但豬肉真係貴到唔敢買,咁就嚟煲雞湯。烏雞加埋石斛、太子蔘同螺片一齊煲,有滋陰清熱同益胃生津功效添~
10 SEPTEMBER 2019(TUE)
又嚟大手入左好多煲湯材料,緊係啦....我要煲多啲靚湯俾兩位老細飲,尤其要努力養肥瘦猛猛嘅小小豬先得嘛!
係買左咁多材料都唔知煲咩好嘅時候,店主叔叔就教我先嚟煲日月魚,仲教我加埋節瓜、淮山、合桃一齊煲湯,啖湯超甜又正氣,最重要係可以補腦兼明目,啱晒剛剛開學嘅小小豬呀~
6 SEPTEMBER 2019(FRI)
熟小小豬嘅朋友都知道佢係一位不折不扣嘅大富翁控,屋企有嘅大富翁遊戲加加埋埋都有成10盒。其實....看似盒盒都係一樣,不過小小豬總係話好唔同,每盒嘅玩法都各有樂趣(佢仲叫我話遲幫佢拍片同大家分享哦)。既然佢鐘意我又覺得大富翁遊戲係益智得嚟又好啱一家大細齊齊玩,所以...就由佢變成一名大富翁痴啦...哈哈哈!
知道帝京酒店今期嘅自助晚餐係以大富翁為主題,咁就當然要帶依個小粉絲嚟潮聖開心一番啦~